Departamenti Ligjor i Ministrisë së Administrimit të Pushtetit Lokal (MAPL), në bashkëpunim me Misionin e OSBE-së, organizoi takimin e rregullt me kryesuesit e kuvendeve të komunave, me fokus në procesin e vlerësimit të ligjshmërisë së akteve të kuvendeve komunale.
Në takim morën pjesë përfaqësues të MAPL-së dhe OSBE-së, kryesues të kuvendeve të komunave, zyrtarë komunalë, si dhe përfaqësues të ministrive të linjës.
Gjatë takimit u prezantua dhe u diskutua raporti për vlerësimin e ligjshmërisë së akteve të kuvendeve të komunave, ndërsa vëmendje e veçantë iu kushtua sfidave të evidentuara në praktikë gjatë këtij procesi. Pjesëmarrësve iu ofruan gjithashtu sqarime lidhur me interpretimin dhe zbatimin e drejtë të kornizës ligjore në fuqi.
Takimi shërbeu edhe si platformë për shkëmbimin e përvojave dhe praktikave ndërmjet institucioneve qendrore dhe nivelit lokal, me synim avancimin e cilësisë së akteve komunale dhe sigurimin e përputhshmërisë së tyre me legjislacionin në fuqi.
Në përfundim të takimit u ritheksua rëndësia e bashkëpunimit dhe koordinimit të vazhdueshëm ndërmjet MAPL-së dhe komunave, me qëllim të sigurimit të zbatimit të drejtë dhe të njëtrajtshëm të legjislacionit, forcimit të ligjshmërisë dhe rritjes së cilësisë së vendimmarrjes në nivel lokal.
