Fushëveprimi

Rregullorja Nr. 17/2024 për organizimin e brendshëm dhe sistematizimin e vendeve të punës të Ministrisë së Administrimit të Pushtetit Lokal zbatohet për Ministrinë e Administrimit të Pushtetit Lokal.

Detyrat dhe përgjegjësitë e Ministrisë së Administrimit të Pushtetit Lokal, përcaktohen me Shtojcën “9” të Rregullores së Qeverisë Nr. 14/2023 për Fushat e Përgjegjësisë Administrative të Zyrës së Kryeministrit dhe Ministrive dhe me legjislacionin përkatës në fuqi.

Ministria e Administrimit të Pushtetit Lokal (në tekstin e mëtejmë: MAPL) ka përgjegjësitë si në vijim:

1.Përgatit politika publike dhe legjislacion në fushën e vetëqeverisjes efikase komunale dhe për nxitjen e pjesëmarrjes së qytetarëve në procesin e vendimmarrjes në nivelin lokal dhe zbaton ato;

2.Promovon dhe afirmon të drejtën e organeve lokale për vetëqeverisje lokale në pajtim me Kartën Evropiane për Vetëqeverisje Lokale;

3.Bashkërendon dhe promovon zhvillimin e reformës së pushtetit lokal;

4.Bashkërendon dhe përkrah bashkëpunimin ndërkomunal dhe ndërkufitar;

5.Mbikëqyrë cilësinë e shërbimeve komunale;

6.Identifikon dhe zhvillon programe për ngritjen e kapaciteteve institucionale të organeve të vetëqeverisjes lokale;

7.Promovon dhe zhvillon transparencën e organeve të vetëqeverisjes lokale;

8.Ofron këshilla dhe udhëzime ligjore për komunat;

9.Bashkërendon aktivitetet e agjencive ndërkombëtare dhe organizatave joqeveritare që kanë të bëjnë me komunat duke përfshirë koordinimin e agjendës evropiane për komuna;

10.Vlerëson ligjshmërinë e akteve të organeve komunale në bashkëpunim me ministritë përkatëse;

11.Monitoron dhe mbikëqyrë komunat gjatë zbatimit të përgjegjësive dhe kompetencave të tyre në bashkërendim me ministritë përkatëse;

12.Kontribuon në respektimin dhe promovimin e të drejtave të njeriut nga organet e vetëqeverisjes lokale;

13.Kryen edhe detyra të tjera, që i caktohen ministrisë me legjislacionin përkatës në fuqi.