Ministria e Administrimit të Pushtetit Lokal prezantoi raportin mbi të arriturat, sfidat dhe projektet e implementuara … Prishtinë, 15 qershor 2011
Slobodan Petrovic: Ne duam të kontribuojmë në të gjitha proceset demokratike në Kosovë dhe gati të gjitha këto procese janë të lidhura me komunat.
Ministria e Administrimit të Pushtetit Lokal prezantoi raportin mbi të arriturat, sfidat dhe projektet e implementuara gjatë periudhës kohore prej 100 ditësh.
Ministri i Administrimit të Pushtetit Lokal, njëherit Zëvendëskryeministër i Kosovës, z. Slobodan Petrovic, gjatë fjalimit të tij tha se MAPL, gjatë kësaj periudhe ka shënuar vazhdimësi në implementimin e politikave strategjike dhe në zbatimin e projekteve të planifikuara mbi bazën e strategjisë afat-mesme për pushtetin lokal 2012-2015.
Ne duam të kontribuojmë në të gjitha proceset demokratike në Kosovë dhe gati të gjitha këto procese janë të lidhura me komunat” tha Zëvendëskryeministri Petrovic gjatë fjalimit të tij.
Ndër sukseset e arritura nga MAPL-ja në procesin e decentralizmit, Zëvendëskryeministri Petrovic përmendi komunat e reja: Graçanicë, Ranillugë, Partesh, Kllokot dhe Novo Bërdë, në të cilat komuna shërbimet komunale për qytetarët por edhe infrastruktura është përmirësuar dukshëm.
"MAPL, gjatë kësaj kohe, ka nënshkruar 45 Memorandume Mirëkuptimi për financimin e projekteve për komuna, në vlerë prej rreth 5 milion euro. Këto projekte kanë të bëjnë me rregullimin e sistemit të ujësjellësit, ndërtimin e urave, rrugëve etj”, tha Zëvendëskryeministri Petrovic gjatë konferencës për media.
Prezantimin e raportit 100 ditësh të MAPL-së në detaje, e bëri z. Besnik Osmani, Sekretar i Përgjithshëm i Ministrisë. Ai përmendi një varg aktivitetesh të cilat suksesshëm shënojnë njëqind ditshin e MAPL-së.
"MAPL ka vazhduar me hartimin e analizave strategjike lidhur me inspektoratet komunale, parimet dhe kriteret e komunave të reja, si dhe ka vazhduar me zhvillimin e legjislacionit të nevojshëm si dhe me takimet në kuadër të bashkëpunimit ndërkufitar me vendet fqinje”, tha z. Osmani, Sekretar i Përgjithshëm i Ministrisë.
Gjithashtu z. Osmani prezantoi të arriturat e MAPL-s në fushat si: bashkëpunimi rajonal, partneriteti me komunat, koordinimi i aktiviteteve me komunitetin diplomatik, mbikëqyrja e ligjshmërisë dhe performanca e komunave, progresi në implementimin e Pakos së Ahtisarit si dhe procesi i decentralizmit.