Zëvendëskryeministri Slobodan Petrovic është i sigurt se nuk do të realizohet asgjë nga idetë e… Ndarja e Kosovës, opsion i dështuar
14 qershor 2011, Prishtinë
Zëvendëskryeministri Slobodan Petrovic është i sigurt se nuk do të realizohet asgjë nga idetë e zyrtarëve të Beogradit për ndarje të Kosovës. Ai ka thënë për Express se ky opsion është i dëmshëm për serbët që jetojnë në Kosovë, por rrezikon edhe tërë rajonin. Ministri i Pushtetit lokal beson se do t’ia dalë të krijojë komunën e re në pjesën veriore të Mitrovicës
Në debatin rreth ndarjes së Kosovës që është iniciuar nga zyrtarë të lartë të Qeverisë së Serbisë, është përfshirë edhe Slobodan Petrovic, kryetari i partisë më të madhe të serbëve të Kosovës dhe zëvendëskryeministër në Qeveri.
Ai e kundërshton këtë opsion duke e cilësuar të dëmshëm për serbët e Kosovës, por edhe për rajonin. Zëvendëskryeministri Petrovic ka thënë për Express se ideja e ndarjes është një ide e rrezikshme që sjell më shumë dëm sesa dobi.
"Qëndrimi e partisë sime dhe shumicës së serbëve që jetojnë në Kosovë është kundër çdo ndarjeje, dhe nëse ju kërkoniindarje që avokon Partia e Pavarur Liberale (SLS), ajo mund të ndahet në të suksesshëm dhe të pasuksesshëm”, ka deklaruar Petrovic.
Sipas tij, idetë e ndarjeve, në vitet e fundit kanë shkaktuar humbje të jetëve jo vetëm këtu, por edhe në të gjithë rajonin.
"Ne patjetër do të luftojmë kundër disa prej këtyre ideve dhe unë jam pothuajse i sigurt se kjo do të mbetet vetëm në fjalë, thjesht për shkak që një mbështetje të tillë nuk do e merrnin, atë që është tashmë e qartë, as prej Brukseli, apo prej Washingtoni ose prej botës normale. Kështu që, ndoshta një ide e tillë vetëm do të hapë probleme dhe kjo do të çojë në një efekt domino. Atëherë, kjo çështje do të hapet për Sanxhak, Maqedoni, Preshevë, Mal të Zi. Kjo është diçka që do të kishte krijuar një problem shumë të madh dhe unë jam i sigurt se nuk do të realizohet”, ka thënë ai.
Petrovic shtoi se tema e ndarjes është hapur nga dikush që të promovohet apo ta përdorë për të bërë një fushatë personale ose ndonjë interes partiak.
Lideri i Partisë së Pavarur Liberale Serbe (SLS) që e ka marrë numrin më të madh të votave nga qytetarët serbë të Kosovës, udhëheq Ministrinë e Pushtetit Lokal që për mision kryesor ka implementimin e decentralizimit, sipas Pakos së Ahtisaarit.
"Sigurisht një nga prioritetet e kësaj ministrie është procesi i decentralizimit dhe në kuadër të decentralizimit, krijimi i komunave të reja, në këtë rast, Komunës së re të Mitrovicës veriore. Kjo është një nga prioritetet që kemi në ministri. Detyra jonë është natyrisht forcimi i komunave të sapokrijuara si shembulli më i mirë për komunën e re të Mitrovicës së Veriut. Sigurisht kjo është një nga prioritetet që unë mund të them për Qeverinë dhe gjithashtu për partnerët tanë nga bashkësia ndërkombëtare që e mbikëqyrin këtë proces”, tha ai.
Petrovic u ka bërë thirrje edhe partnerëve ndërkombëtarë në procesin e krijimit të Komunës në veri të Mitrovicës.
"Ajo që na pret është vazhdimi i mëtejshëm i këtij procesi në veri të Kosovës, i cili kërkon një angazhim më të madh si dhe pjesëmarrjen e të gjithë aktorëve që janë në Kosovë dhe më gjerë, jo vetëm Ministria e Pushtetit lokal, por është e domosdoshme edhe pjesëmarrja e ICO’së, dhe pjesëmarrja e BE’së dhe EULEX’it”, ka shtuar ai.
Kreu i MAPL’së tha se ka qëndruar për vizita në veri të vendit, ku ka takuar bashkëkombësit e tij.
"Ajo çka është evidente, është pakënaqësia e tyre me statusin e tyre dhe cilësinë e jetës. Shumica e njerëzve janë të pakënaqur me këtë dhe ka nevojë për të ndryshuar diçka në këtë fushë. Për procesin e formimit të një komune të re si në veri të Mitrovicës, presim përkrahje nga miqtë tanë ndërkombëtarë, thjesht sepse kjo do të jetë një garanci që ajo do të jetë një zgjidhje afatgjatë”.
Petrovic tha se për këtë periudhë sa është ministër i Pushtetit loakl, është arritur të hapet një tjetër objekt në Veri, që do të përdoret për ekipin përgatitor, për zyrën ndërlidhëse, por do të shërbejë edhe për të lehtësuar procedurat për marrjen e dokumenteve nga qytetarë të Mitrovicës Veriore.
"Atë që ne kemi si rezultat është se një numër i madh i njerëzve, për një kohë të shkurtër kanë kërkuar shërbime prej njerëzve tanë dhe kjo është një shenjë e mirë që po lëviz ngadalë drejt një normalizimi dhe në anën tjetër, kemi mundësi prej dialogut midis Beogradit dhe Prishtinës, dhe unë pres që këto biseda të mundësojnë procesin e decentralizimit sa më të lehtë dhe në të vërtetë presim që t’i kemi qytetarët tanë që jetojnë në këtë pjesë të Kosovës si partnerë”, ka thënë Petrovic.
Duke përmendur përmirësimin e kushteve në komunat e krijuara me procesin e decentralizimit, Petrovic tha se ato janë shembulli më i mirë për Mitrovicën e Veriut që të shohin se decentralizimi nuk është thjesht një obligim i një procesi, por për nevojat e atyre njerëzve që jetojnë atje.
"Unë jam i sigurt se në këtë mënyrë do të kenë më shumë mundësi për të siguruar kushte më të mira të jetesës për veten dhe familjet e tyre”, ka thënë ai.
Kreu i MAPL’së është duke punuar për organizimin e një konference ndërkombëtare në Kosovë.
"Gjatë vizitave që kisha në Shqipëri, Mal të Zi dhe Slloveni, bashkëbiseduesit e mi i ftova për një konferencë ndërkombëtare që do të mbahet këtu në Prishtinë. Ne do të jemi organizatorë dhe mikpritës të tyre. Ne presim që kjo do të jetë konferenca më e madhe e këtij karakteri. Në këtë konferencë, do të marrin pjesë të gjithë ministrat ose zyrtarë të nivelit ministror nga shtetet e rajonit. Do të jetë një numër i konsiderueshëm i vendeve të Bashkimit Europian dhe kjo sigurisht është një shenjë e mirë, një mesazh i mirë për të gjitha ato procese që i kemi hartuar së bashku, procese këto kryesisht në rrugën e integrimit euroatlantik”, ka thënë Petrovic.
Intervistoi: Valmir Klaiqi, "Express"
