Prishtinë, 31 korrik 2019
Dje, Ministrja e Administrimit të Pushtetit Lokal Adrijana Hodžić prezantoi Raportin 100 ditor të punës së Ministrisë.
Ministrja Hodžić në prezantimin e saj theksoi “ Besoj se të gjithë jeni të njohur se është në mandatin e MAPL-së të monitoroj funksionimin e të gjithave komunave në nivel të Kosovës. Mandati jonë është që vetëqeverisjes lokale në Kosovë t’i sigurojmë dhe t’i ofrojmë përkrahjen e nevojshme nga niveli qendror sepse përkrahja për komunat është përkrahje për qytetarët tanë”.
Më tej, Ministrja Hodžić vuri në fokus arritjet dhe sfidat e MAPL-së për këto 100 ditë të punës, në fushat si: zhvillimi i legjislacionit, mbikëqyrja dhe monitorimi i komunave në ushtrimin e funksioneve publike, agjenda evropiane, performanca komunale, transparenca, bashkëpunimi ndër-komunal, komunal ndërkombëtar dhe ndërkufitar, si dhe zhvillimi i qëndrueshëm komunal.
Për periudhën 100 ditore të punës, janë nënshkruar 45 Marrëveshje me Kryetarët e Komunave, për të realizuar 45 projekte të investimeve kaptiale, në vlerë prej 2, 861, 445.00 Euro. Poashtu, Ministrja Hodzic, ka prezantuar se në periudhën 100 ditore janë lansuar 2 fonde stimuluese për komunat: fondi për barazi gjinore dhe fondi për bashkëpunim ndër-komunal.
Në fund të prezantimit, Ministrja Hodzic, ka paraqitur rekomandimet që duhet të adresohen si një përpjekje e përbashkët institucionale për të përmirësuar dhe mbështetur vetëqeverisjet lokale:
- Integrimi cilësor i komuniteteve në organet e vetëqeverisjes lokale;
- Transparenca;
- Përfshirja e qytetarëve në procesin e vendimmarrjes;
- Përfshirja e të rinjve në të gjitha proceset e planifikimit dhe zbatimit të politikave lokale;
- Rritja e sigurisë në ndërtim;
- Rritja e përfaqësimit të grave në organet vendimmarrëse;
- Rritja e bashkëpunimin ndërmjet komunave.
Gjithashtu, të pranishmëve iu adresua edhe z. Jan Braathu, Ambasadori i OSBE-së – Misioni në Kosovë i cili theksoi se “ OSBE së bashku me MAPL-në kanë një bashkëpunim të shkëlqyer në realizimin e Planit të Përbashkët Programatik MAPL – OSBE, plan i cili derivon nga Strategjia për Vetëqeverisje Lokale 2016 – 2026. Ai ka vlerësuar lart punën e Ministres së Administrimit të Pushtetit Lokal dhe ekipit të saj”.
Në këtë ngjarje pjesëmarrës ishin deputetë nga Kuvendi i Kosovës, Ambasadorë të huaj, përfaqësues të organizatave ndërkombëtare dhe vendore në Kosovë, si dhe përfaqësues nga shoqëria civile.
