17 shkurt 2019, Prishtinë
Organizuar nga Ministria e Administrimit të Pushtetit Lokal, sot u nënshkruan Marrëveshjet e Bashkëpunimit Komunal Ndërkombëtar ndërmjet komunave Fushë Kosovë dhe Lipjan me komunat Civita dhe Frascineto, nga Italia.
Me rastin e nënshkrimit të Marrëveshjeve të Bashkëpunimit Komunal Ndërkombëtar mes komunave të Kosovës, Sekretarja ë Përgjithshme e Ministrisë së Administrimit të Pushtetit Lokal, znj. Rozafa Ukimeraj tha se rëndësia e këtij bashkëpunimi ndërmjet dy komunave në Itali dhe komunave të Kosovës, shkon përtej një bashkëpunimi të rëndomtë; sepse karakterizohet nga një element shtesë që lidhë të dyja vendet në ruajtjen vlerave të gjuhës, kulturës dhe traditës arbëreshe; e që për ne në Kosovë këto vlera rezervojnë një vend shumë të vlefshëm, sepse ato vlera ne i kultivojmë çdo ditë dhe i ruajmë e garantojmë me aktet themeltare të shtetit tonë të ri.
Ndërsa, kryetarët e komunave nga Civita z. Alessandro Tooci dhe Frascineto z. Angelo Catapano dhe kryetarët e komunave të Kosovës, z. Imri Ahmeti dhe z. Burim Berisha shprehën mirënjohje dhe falënderim të ndërsjellë për iniciativën e MAPL-së dhe u zotuan se Marrëveshjet e Bashkëpunimit komunal ndër-kombëtar të nënshkruara sot, do të zgjerohen dhe në fushua të tjera të bashkëpunimit.
