Ministria e Administrimit të Pushtetit Lokal në bashkëpunim me projektin DEMOS/ Helvetas – Swiss Intercooperation Kosovo, nga data 2 – 5 mars 2016, kanë organizuar këshillimin e përbashkët dhe vizitën studimore për Zyrtarët Komunal për Integrime Evropiane dhe Zyrtarët e MAPL-së me temë “Roli i komunave në përmbushjen e obligimeve nga agjenda evropiane 2016“.
7 mars 2016, Prishtinë
REALIZIMI I KËSHILLIMIT TË PËRBASHKËT DHE VIZITËS STUDIMORE PËR ZYRTARËT KOMUNAL PËR INTEGRIME EVROPIANE DHE ZYRTARËT E MAPL-së ME TEMË:
“ROLI I KOMUNAVE NË PËRMBUSHJEN E OBLIGIMEVE NGA AGJENDA EVROPIANE 2016”
Ministria e Administrimit të Pushtetit Lokal në bashkëpunim me projektin DEMOS/ Helvetas – Swiss Intercooperation Kosovo, nga data 2 – 5 mars 2016 kanë organizuar këshillimin e përbashkët dhe vizitën studimore për Zyrtarët Komunal për Integrime Evropiane dhe Zyrtarët e MAPL-së me temë “Roli i komunave në përmbushjen e obligimeve nga agjenda evropiane 2016“. Realizimi i programit kishte për qëllim shkëmbimin e përvojave me vendet e rajonit, veçanërisht me Bashkinë e Shkodrës nga Shqipëria, Komunën e Ulqinit dhe Komunën Urbane të Tuzit nga Mali i Zi, si dhe finalizimin e planeve individuale për secilën komunë për sa i përket obligimeve nga agjenda evropiane. Po ashtu, programi ishte i kombinuar edhe me ligjërata nga përfaqësuesit e institucioneve nga niveli qendror, me theks të veçantë nga Ministria e Shtetit për Çështje Vendore të Republikës së Shqipërisë në kontekst të shkëmbimit të përvojave dhe mënyrës së koordinimit të aktiviteteve dhe bashkëpunimit ndërmjet nivelit qendror dhe lokal, si dhe në rolin e ndërsjellët për sa i përket koordinimit të agjendës evropiane. Nga objektivat kryesore të programit të këshillimit të përbashkët dhe vizitës studimore në Shqipëri dhe Mali i Zi të cilat u realizuan ishin, si në vijim:
Është bërë hapja e takimit të përbashkët nga Udhëheqësja e DIEKP-s znj. Rozafa Ukimeraj, prezantimi i matricës gjithëpërfshirëse të komunave nga obligimet e agjendës evropiane, si dhe është bërë ndarja në grupe me qëllim të finalizimit të matricës gjithëpërfshirëse. Në hapin final, secili nga grupet ka bërë prezantimin e ndryshim plotësimeve të bëra në matricë dhe krahas kësaj është zhvilluar diskutim i përgjithshëm në kontekst të finalizimit të matricës gjithëpërfshirëse.
Është bërë prezantimi i ligjëratës nga z. Enea Hoti, këshilltar i Ministrit të Ministrisë së Shtetit për Çështje Vendore me temë “ Roli i Qeverisjes Vendore në procesin e integrimit evropian”. Të pranishmit u informuan lidhur me ndarjen territoriale të cilën e ka të organizuar Shqipëria, Strategjinë e Decentralizimit, kompetencat e komunave, pastaj për çështjen e reformës së administratës publike, përafrim të legjislacionit, monitorimin dhe zbatimin e legjislacionit vendor, çështjen e fondeve të BE-së në të cilat Shqipëria është përfituese e programeve të ndryshme rajonale dhe transnacionale, prokurimin publik, si dhe centralizimin e procesit të integrimit evropian.
Është realizuar vizita studimore në Bashkinë e Shkodrës me Kryetaren e Bashkisë znj. Voltana Ademi dhe stafin mbështetës të saj. Kryetarja znj. Ademi i informoi të pranishmit me punën që bëhet në Bashkinë e Shkodrës, përfshirë menaxhimin e përgjithshëm, organizimin në zonat urbane dhe zonat rurale të Bashkisë, njësitë administrative, për çështjen infrastrukturore, rrjetin e ujërave, menaxhimin e mbeturinave.
Është realizuar vizita studimore në Komunën e Ulqinit me kryetarin z. Fatmir Gjeka dhe stafin e tij mbështetës. Z.Gjeka potencoi faktin se Komuna e Ulqinit është vend multi-etnik dhe fetar dhe vazhdon të ruaj këtë diversitet me qëllim të ndërtimit të urave të bashkëpunimit. Gjithashtu, Ulqini konsiderohet si vend model për tolerancë, gjuhën e mirëkuptimit dhe respektimit të njëri tjetrit. Po ashtu, një prezantim para të pranishmëve e bëri z. Arslan Hajdinaga për sa i përket rolit të komunës së Ulqinit në çështjen e procesit të integrimit evropian të Malit të Zi, përfitimit të fondeve, realizimit të projekteve të ndryshme, ndërmarrjes së iniciativave rajonale dhe zhvillimit rajonal, si dhe një sërë çështjes të tjera.
Është realizuar vizita studimore në Komunën Urbane të Tuzit me Kryetarin e Komunës z. Abedin Adzovic, kryesuesin e kuvendit të komunës dhe stafin mbështetës të tij. Kryetari z. Adzovic i informoi të pranishmit me punën që po bëhet në Komunën Urbane të Tuzit dhe kontributin e komunitetit dhe të bashkatdhetarëve për sa i përket investimeve dhe dërgimit të remitancave. Po ashtu, ishte akordim i përbashkët që bashkëpunimi duhet thelluar edhe më tej me qëllim të shkëmbimit të përvojave nga të dy vendet fqinje.
Në shenjë mirënjohje dhe respekti, MAPL u ka dhuruar nga një Hyjneshë të Prishtinës këshilltarit të Ministrit të Ministrisë së Shtetit për Çështje Vendore, kryetares së Bashkisë së Shkodrës, kryetarit të Komunës së Ulqinit dhe kryetarit të Komunës Urbane të Tuzit.
