Tribuna: Pas publikimit të rezultateve finale për Asambletë Komunale si dhe pas publikimit të rezultateve finale për kryetarë komunash, sa kohë duhet pritur që të zgjedhurit e rinj të fillojnë punën?
10 dhjetor 2013, Prishtinë
Tribuna: Pas publikimit të rezultateve finale për Asambletë Komunale si dhe pas publikimit të rezultateve finale për kryetarë komunash, sa kohë duhet pritur që të zgjedhurit e rinj të fillojnë punën?
Osmani:
Menjëherë pas certifikimit të rezultateve nga KQZ, fillon procesi i implementimit të rezultateve zgjedhore. Kufiri maksimal kohor i konstituimit të organeve të Komunave, i lejuar sipas legjislacionit në fuqi, është 45 ditë nga dita e certifikimit. Ne nuk presim që të gjitha institucionet lokale të inaugurohen në të njëjtën kohë sepse do të varet nga aranzhimet organizative të zyrtarëve kompetent nëpër komuna të ndryshme, por asnjëra nga komunat nuk do të mund të mbajë sesionet inauguruese para 7 ditëve nga data e certifikimit (për arsye se ftesa për mbajtjen e seancës, tek anëtarët e zgjedhur nëpër komuna duhet të dërgohet 7 ditë para ditës së mbajtjes së seancës) dhe jo më vonë se 45 ditë nga dita e certifikimit të rezultateve zgjedhore.
Tribuna: Kush i thërret delegatët e rinj dhe kryetarët në seancën inauguruese?
Osmani:
Seancën e parë inauguruese e thërret Kryesuesi në detyrë (Kryesuesi aktual) i Kuvendit të Komunës përkatëse, brenda afatit 15 ditor, nga dita e certifikimit të rezultateve zgjedhore. Nëse kjo nuk ndodhë, fillon të rrjedhë afati i dytë kohor prej 15 ditëve, që anëtari më i vjetër, i zgjedhur në legjislaturën e re të Kuvendit të Komunës, të bëjë ftesën për mbledhjen inauguruese. Në rast të dështimit edhe në këtë fazë, mbledhja thirret me ftesën e 1/3 së anëtarëve të përgjithshëm të Kuvendit të Komunës përkatëse.
Tribuna: A ka nevojë që gjitha komunat tjera mos ta bëjnë inaugurimin për të pritur edhe përfundimin e zgjedhjeve të përsëritura në Partesh?
Osmani:
Kjo varet nga rezultatet e certifikimit nga organi kompetent, në këtë rast Komisioni Qendror i Zgjedhjeve. Në rast se certifikohen të gjitha rezultatet e Komunave tjera me përjashtim të Komunës së Parteshit, për të gjitha Komunat tjera, afati ligjor fillon të rrjedhë, me ditën e certifikimit të rezultateve të komunave përkatëse. Me këtë rast, Komunat tjera ndjekin procedurat ligjore të inaugurimit dhe të konstituimit të organeve të tyre, pa pasur nevojë të presin për certifikimin e zgjedhjeve, në rastin konkret në Komunën e Parteshit. Pas mbajtjes së zgjedhjeve dhe certifikimit të rezultateve nga KQZ, vetëm për Komunën e Parteshit, fillojnë të rrjedhin afatet ligjore dhe natyrisht se duhet të respektohen procedurat e njëjta, ashtu siç parashihet me legjislacionin në fuqi me rastin e konstituimit të organeve edhe për këtë Komunë.
Në procesin e implementimit të rezultateve zgjedhore, është e rëndësishme që për secilën komunë të certifikohen rezultatet zgjedhore për dy organet e komunës: për Kryetar dhe Kuvend të Komunës pasi që fillimisht, betimin për marrjen e mandatit e bëjnë anëtarët e Kuvendit të Komunës. Me këtë rast plotësohen kushtet ligjore që të bëhet edhe betimi i Kryetarit të Komunës, sepse sipas Ligjit për vetëqeverisje Lokale, Kryetari jep betimin para anëtarëve të Kuvendit të Komunës.
Tribuna: Në këto zgjedhje ka pasur shumë ndërrime të pushteteve dhe zgjedhje të asamblistëve të rinj, rrjedhimisht komunat do të mbushen me njerëz të rinj e të papërvojë. A ka MAPL ndonjë manual apo mekanizëm që do tu shërbejë të zgjedhurve të rinj që të punojnë duke u bazuar në LVL?
Osmani:
MAPL ka përgatitur një plan aksional që do të fillojë të zbatohet menjëherë pas certifikimit të rezultateve zgjedhore duke përfshirë këtu aktivitetet që kanë të bëjnë me organizimin e seancave informuese për të gjithë të zgjedhurit lokal, pakon e dokumentave ligjore dhe doracakët për vetëqeverisjen lokale si dhe organizimin e sesioneve trajnuese për të gjithë anëtarët e zgjedhur të Kuvendeve të komunave. Sa i përket sesioneve informuese do të mbahen para inaugurimit të organeve të Komunave dhe kanë për qëllim që anëtarët e zgjedhur të informohen në lidhje me procedurat dhe obligimet ligjore sa i përket konstituimit të organeve lokale. Trajnimet për të gjithë anëtarët e zgjedhur dhe Kryetarët e Komunave do të organizohen pas konstituimit të organeve lokale duke u fokusuar në temat si vijon: parimet e organizimit dhe të funksionimit të pushtetit lokal; legjislacioni; demokracia lokale; administrimi financiar, roli i anëtarit të Kuvendit të Komunës etj. Përveç aktiviteteve për ngritjen e kapaciteteve profesionale, për nevojat e anëtarëve të Kuvendeve dhe Kryetarëve të Komunave, MAPL ka përgatitur doracakët për funksionimin e vetëqeverisjes lokale, në gjuhët shqipe, serbe, turke dhe angleze. Këta doracakë do t’u shpërndahen të zgjedhurve në seancat informuese, menjëherë pas certifikimit të rezultateve dhe para mbajtjes së seancave inauguruese. Në kuadër të pakos së dokumentave ligjore janë përgatitur edhe doracakë me përmbajtje të ligjeve që rregullojnë fushën e vetëqeverisjes lokale në Kosovë dhe që përmbajnë të gjitha provizionet ligjore që kanë ndikim në organizimin dhe punën e organeve të vetëqeverisjes lokale.
Tribuna: Në zgjedhjet lokale 2013 është themeluar edhe komuna e re e Mitrovicës së veriut. A i ka bërë MAPL përgatitjet për formalizimin e kësaj komune të re?
Osmani:
Sikurse për komunat tjera edhe për këtë komunë janë bërë të gjitha përgatitjet e nevojshme për konstituimin e organeve. Meqenëse kemi të bëjmë me inaugurimin e organeve të Komunës, në një komunë të re siç është Mitrovica veriore, ftesa dhe thirrja për seancën e parë do të bëhet nga anëtari më i vjetër, i zgjedhur nga radhët e anëtarëve të Kuvendit të Komunës.
Tribuna: Shumica e komunave, në mandatin e kaluar kanë blerë llap-topë për kryetarët, drejtorët si dhe asamblistët. A obligohen ata kryetarë, drejtorë dhe asamblistë që nuk janë zgjedhur më, që t’i kthejnë ato pajisje të komunave për tu përdorur nga pasardhësit e tyre?
Osmani:
Gjithë pasuria publike e blerë nga fondet publike apo e dhuruar nga donatorët është pasuri i institucioneve publike dhe duhet të vazhdojë të përdoret nga bartësit e funksioneve publike. Edhe në këtë rast, këtë pasuri duhet ta përdorin të zgjedhurit e rinj apo zyrtarët që do të zëvendësojnë pozitat në kuadër të administratës së Komunës.
